حوزہ علمیہ کے علماء اور طلبہ کا احتجاجی اجتماع، ولی امرمسلمین سے تجدید عہد

قم: ایران کے دینی مرکز قم میں حوزہ علمیہ کے علما اور طلبہ نے فرانس کے میگزین چارلی ہیبڈو کے توہین آمیز اقدام کی مذمت میں اجتماع کا اہتمام کیا۔ اور ولی امر مسلمین آیت اللہ خامنہ ای سے تجدید عہد کیا۔ یہ اجتماع حضرت فاطمہ معصومہ بنت امام موسی کاظمؑ کے صحن امام رضاؑ میں ہوا۔ شرکاء نے ولی امر مسلمین کی تصاویر اٹھا رکھی تھیں اور مذکورہ میگزین اور متعلقہ ذمہ داروں کے خلاف نعرے لگائے اور مذہبی قیادت اور مقدسات کی بے حرمتی کو ناقابل قبول قرار دیا۔اجتماع میں ایرانی دینی مدارس کے سربراہ آیت اللہ آراکی، تہران کے امام جمعہ آیت اللہ سید احمد خاتمی، جامعہ مدرسین قم کے سربراہ آیت اللہ حسینی بوشہری، حوزہ علمیہ کی اعلیٰ انتظامی کونسل کے رکن آیت اللہ مقتدی بھی موجود تھے۔ اجتماع میں دینی طالبات کی بھی ایک بڑی تعداد شریک تھی، جنہوں نے اپنے ہاتھوں میں ولی امر مسلمین، حاج قاسم سلیمانی کی تصاویر اٹھا رکھی تھیں۔ اجتماع میں آزادی اظہار کے نام پر مغرب کی دُہری پالیسیوں اور معیارات کی مذمت کی گئی اور دینی مقدسات اور مذہبی قیادت کی کسی بھی حوالے سے توہین و ہتک حرمت کو مسترد کیا گیا۔