وزیر اعظم شہباز شریف کی چینی ہم منصب اور چینی صدر شی جن پنگ سے اہم ملاقات

بیجنگ : وزیر آعظم شہباز شریف نے چینی ہم منصب کے بعد چینی صدر شی جن پنگ سے اہم ملاقات کی۔ جس میں پاک چین دوطرفہ تعلقات، خطے کی صورتحال اور باہمی تعاون کے فروغ سمیت مختلف اہم امور پر تفصیلی تبادلہ خیال کیا گیا۔ دونوں ممالک کے درمیان اقتصادی ترقی، تجارت، زراعت، ماحولیات، میڈیا اور موسمیاتی تبدیلی سمیت کئی معاہدوں اور مفاہمت کی یادداشتوں پر دستخط کئے گئے۔ وزیراعظم آفس کے مطابق معاہدے تجارت، سرمایہ کاری، زراعت، سائنس و ٹیکنالوجی، موسمیاتی تبدیلی، تعلیم، میڈیا اور عوامی روابط سمیت مختلف شعبوں میں دوطرفہ تعاون کے فروغ سے متعلق ہیں۔ وزیراعظم کی چینی ہم منصب سے ملاقات میں پاک چین شراکت داری کو نئے مرحلے میں داخل کرنے پر اتفاق کیا گیا۔
اس موقع پر وزیراعظم کا کہنا تھا کہ پاک چین دیرینہ اسٹریٹجک تعاون پر مبنی شراکت داری پاکستان کی خارجہ پالیسی کا بنیادی ستون ہے، دونوں ممالک کے درمیان آہنی دوستی، اسٹریٹجک تعاون، ترقی اورخوشحالی کے مشترکہ عزم پر مبنی ہے۔