سعودی ولی عہد سے ریاض میں وزیر اعظم شہباز شریف کی ملاقات

ریاض : سعودی ولی عہد و وزیر اعظم شہزادہ محمد بن سلمان سے ریاض میں پاکستان کے وزیر اعظم شہباز شریف نے ملاقات کی ہے۔ شہباز شریف نے ایکس اکاونٹ پر لکھا کہ سعودی ولی عہد شہزادہ محمد بن سلمان سے ملاقات کا اعزاز حاصل ہوا، ان کی مہمان نوازی پر شکریہ۔ ان کا کہنا تھا کہ سعودی عرب کے ساتھ پاکستان کے تعلقات تاریخی اور قابل اعتماد ہیں۔ نتیجہ خیز بات چیت کے دوران ہم نے متعدد شعبوں میں پاکستان اور سعودی عرب کے درمیان تعلقات میں پیش رفت کا جائزہ لیا۔ دوطرفہ تعلقات خاص طور پر تجارت، سرمایہ کاری، ثقافت، ٹیکنالوجی اور دیگر شعبوں میں انہیں مضبوط بنانے کے لیے اپنے عزم کا اعادہ کیا۔