رضاکارانہ ہجرت کی آڑ میں فلسطینیوں کی بیدخلی کا منصوبہ

تل ابیب: اسرائیلی وزیرِ دفاع اسرائیل کاٹز نے غزہ سے فلسطینیوں کی بڑے پیمانے پر بے دخلی کو نام نہاد رضاکارانہ ہجرت قرار دیتے ہوئے منصوبے کو آگے بڑھانے کا اعلان کر دیا۔ اسرائیلی وزیرِ دفاع اسرائیل کاٹز نے کہا ہے کہ غزہ سے فلسطینیوں کی منتقلی کا منصوبہ مناسب وقت اور مناسب طریقے سے آگے بڑھایا جائے گا۔ اسرائیلی میڈیا اور حکومتی بیانات کے مطابق اس منصوبے کے تحت فلسطینیوں کی نام نہاد رضاکارانہ ہجرت کے لیے خصوصی ادارہ قائم کیا جا چکا ہے جو تیسرے ممالک میں منتقلی کے معاملات دیکھے گا۔ صیہونی رکنِ پارلیمنٹ لیمور سون ہار میلیخ نے غزہ کے اطراف کے دورے کے دوران مکمل قبضے، فلسطینیوں کے انخلا اور نئی آبادکاری کا مطالبہ کرتے ہوئے کہا کہ یہی اسرائیل کی سکیورٹی کا واحد راستہ ہے۔ انسانی حقوق کی تنظیموں اور ناقدین نے ان اقدامات کو نسلی تطہیر اور جبری بے دخلی کے مترادف قرار دیا ہے۔