یمن میں انصار اللہ پر حملوں میں بڑی کامیابی نہیں ملی، پینٹاگون

واشنگٹن: امریکی محکمہ دفاع نے یمنی انصار اللہ کے خلاف حملوں میں ناکامی کا اعتراف کرتے ہوئے کہا ہے کہ انصاراللہ کے میزائلوں اور ڈرونز کو تباہ کرنے میں محدود کامیابی ملی ہے۔ امریکی کانگریس میں شدید تشویش پائی جاتی ہے کہ یمن میں جنگ کی جاری صورتحال کی وجہ سے امریکی فوج کو خطے میں اپنی موجودگی اور وسائل کو منتقل کرنے میں مشکلات کا سامنا ہورہا ہے۔ جس سے چین کے خلاف دفاعی طاقت متاثر ہوسکتی ہے۔ پنٹاگون کی جانب سے کانگریس کو آگاہ کیا گیا ہے کہ اگرچہ مشرق وسطی میں جنگی جہازوں اور بحری جہازوں کی تعیناتی کی جارہی ہے، لیکن اس کے نتیجے میں پیسیفک علاقے میں چین کے خلاف دفاعی تیاریوں میں کمی واقع ہورہی ہے۔ جنگی ساز و سامان کے تیز رفتار استعمال کی وجہ سے امریکہ کو اپنی اسٹریٹیجک فورسز کے اہداف پر نظرثانی کرنا پڑسکتی ہے۔