پاکستان امریکا سے دشمنی کا ہرگز متحمل نہیں ہو سکتا، وزیر اعظم شہباز شریف

اسلام آباد : وزیر اعظم پاکستان شہباز شریف نے کہا ہے کہ وہ امریکا سمیت پاکستان کے دیگر اتحادیوں اور دوست ممالک کے ساتھ تعلقات کو ٹھیک کرنے کی کوشش کر رہے ہیں جو کہ پچھلی حکومت کی کچھ غلط خارجہ پالیسیوں کہ وجہ سے اسلام آباد سے دور ہو گئے تھے۔ افطار ڈنر میں صحافیوں کے سوالات کے جوابات دیتے ہوئے انہوں نے واضح طور پر کہا کہ پاکستان امریکا سے دشمنی کا ہرگز متحمل نہیں ہو سکتا۔ وزیر اعظم نے پاکستان تحریک انصاف کی حکومت پر افسوس کا اظہار کرتے ہوئے کہا کہ تحریک انصاف نے پاکستان کے دوست ممالک بالخصوص چین سعودی عرب، قطر اور امریکا کو ناراض کیا جنہوں نے ہمیشہ مشکل حالات میں پاکستان کا ساتھ دیا ہے۔ وزیر اعظم نے امریکا سے تعلقات کو بہتر بنانے پر زور دیتے ہوئے کہا کہ پاکستان اور امریکا کے درمیان عدم اعتماد کو ختم کرنے کی ضرورت ہے اور دونوں ممالک کو اس بات پر غور کرنا ہو گا کہ ماضی میں کسی سے کوئی غلطی تو نہیں ہوئی۔