Raza Musani 
واشنگٹن : امریکی نیوز چینل این بی سی نے دعویٰ کیا ہےکہ امریکی حملوں سے ایران کی تین میں سے صرف ایک جوہری تنصیب مکمل تباہ ہوئی ہے۔ ٹرمپ انتظامیہ نے گزشتہ ماہ ایران پر حملوں میں اس کی تینوں جوہری تنصیبات مکمل تباہ کرنے کا دعویٰ کیا تھا ۔ امریکی صدر ٹرمپ بھی بار بار اپنے دعووں کو دہرا رہے ہیں لیکن امریکی چینل نے اس دعوے کا بھانڈا پھوڑ دیا ہے۔
این بی سی نیوز نے رپورٹ کیا ہے کہ امریکی حملے میں فردو جوہری تنصیب کو شدید نقصان پہنچا ہے اور وہاں دو سال تک یورینیم افزودگی ممکن نہیں رہی ہے۔ رپورٹ کے مطابق نطنز اور اصفہان کی جوہری تنصیبات مکمل طور پر تباہ نہیں ہوئیں۔ انہیں معمولی نقصان پہنچا اور چند ماہ میں یہاں معمول کی سرگرمیاں بحال ہو سکتی ہیں۔
دوسری جانب عالمی جوہری توانائی ایجنسی (آئی اے ای اے) کے چیف رافیل گروسی نے کہا تھا کہ امریکی حملے میں فردو میں نقصان اہم نوعیت کا ہے لیکن ایران کے پاس اب بھی 9 ہزار کلو افزودہ یورینیم موجود ہے۔
