اردن بھی اسرائیل مخالفت، گیس پرپابندی کا قانون تیار

ارکان پارلیمنٹ کی اکثریت نے اسرائیل سے گیس کی درآمد پر پابندی کے لیے مسودہ قانون کے حق میں ووٹ دیا، ہنگامی بنیادوں پر حتمی شکل دینے پر زور
حکومت کو قانونی مسودہ حتمی ووٹنگ کے لیے پارلیمنٹ بھیجنا ہوگا،اسرائیل سے گیس کی درآمد کیخلاف عوام کے احتجاجی مظاہروں کا سلسلہ بھی جاری
عمان(نیوز ڈیسک) اردن میں بھی اسرائیل کے خلاف آوازیں بلند ہونے لگی، ارکان پارلیمنٹ کی اکثریت نے اسرائیل سے گیس کی درآمد پر پابندی کے لیے مسودہ قانون کے حق میں ووٹ دیا، تین ہفتے قبل اردن نے طے شدہ معاہدے کے تحت اسرائیل سے گیس کی درآمد شروع کی تھی، اسرائیل سے دس ارب ڈالر مالیت کی گیس درآمد کے لیے پندرہ برس کا معاہد ہ ہے، اردنی پارلیمنٹ میں قانونی کمیٹی کے چیئرمین عبدالمنعم العودات نے اجلاس میں مجوزہ مسودہ پڑھ کر سنایا۔پارلیمنٹ کے بیشتر ارکان مسودے کی تائید میں کھڑے ہوگئے،ا سپیکر نے وزیراعظم عمر الرزاز کی موجودگی میں کہا کہ پارلیمنٹ کے بیشتر ارکان قانونی مسودے کو حکومت کے حوالے کرنے کے حق میں ہیں اور وہ چاہتے ہیں کہ اسے ہنگامی بنیادوں پر حتمی شکل دے کر نافذ کیاجائے۔ اردنی پارلیمنٹ کی ووٹنگ کے بموجب حکومت کو قانونی مسودہ حتمی ووٹنگ کے لیے پارلیمنٹ بھیجنا ہوگا، مسودے میں کہا گیا کہ حکومت، اس کی وزارتیں، قومی ادارے اور کمپنیاں اسرائیل سے گیس درآمد نہیں کرسکتیں،ادھر اردن میں اسرائیل سے گیس کی درآمد کیخلاف عوام کے احتجاجی مظاہروں کا سلسلہ بھی جاری ہے،دوسری جانب اسرائیل نے اردن کے بعدمصر کو بھی گیس کی فراہمی کا آغاز کر دیا اسرائیل نے گیس کی فراہمی کے لیے ڈولفینس فیلڈ سے مصر تک سمندر میں پائپ لائن بچھائی ہے جہاں سے اسرائیل ابتدائی طور پر مصر کو یومیہ 20 کروڑ مکعب فٹ گیس برآمد کرے گا۔