Raza Musani 
27 رجب المرجب کو عید بعثت کے موقع پر عبادت کرنے والے نہتے فلسطینیوں پر غاصب اسرائیلی فوجیوں نے دھاوا بول دیا۔ جس میں کم از کم پچیس فلسطینی زخمی ہو گئے۔
پیر کے روز فلسطینی باشندے بیت المقدس کے باب العامود پر جمع تھے کہ اچانک صیہونی فوجیوں نے ان پر حملہ کر دیا۔ صیہونی جارحیت میں کم از کم پچیس فلسطینی زخمی ہو گئے جن میں چار کمسن بچے بھی شامل ہیں۔
خیال رہے کہ فلسطین کے شہر بیت المقدس میں واقع مسجد الاقصیٰ کو پیغمبر اسلام سے خاص نسبت حاصل ہے جس کے پیش نظر مدینہ منورہ سے دور فلسطینی عوام سال کی مختلف مذہبی مناسبتوں پر وہاں اکٹھا ہو کر اپنے جذبہ ایمانی کی تسکین کا سامان فراہم کرتے ہیں تاہم غاصب صیہونیوں کو فلسطینیوں کے یہ اقدامات پسند نہیں اور وہ مختلف بہانوں سے انہیں روکنے اور کچلنے کی کوشش کرتے ہیں۔
خود ساختہ صیہونی ریاست اسرائیل اپنے توسیع پسندانہ منصوبوں کو عملی جامہ پہنانے کے لئے کسی بھی انسانی اور قانونی حد کی قائل نہیں ہے اور وہ ہر ممکن شکل میں فلسطینی عوام کی سرکوبی کر کے انہیں فلسطین اور بیت المقدس کی آزادی کے لئے جاری جنگ سے باز رکھنے کی کوشش کرتی ہے تاہم فلسطینی عوام بھی یہ ٹھان چکے ہیں کہ وہ کسی قیمت پر اپنی سرزمین اور قبلہ اول کی آزادی کے مقصد سے پیچھے نہیں ہٹیں گے اور اس راہ میں وہ اپنی جان نچھاور کرنے کے لئے بھی تیار ہیں۔
