ویانا مذاکرات پر کوئی بھی چیز منفی اثر نہیں ڈال سکتی، ایرانی وزیر خارجہ

ماسکو : ایرانی وزیر خارجہ حسین امیر عبداللہیان کا کہنا ہے کہ ایران کے جوہری معاہدے کی بحالی کے لیے ہونے والے ویانا مذاکرات پر کوئی بھی چیز منفی اثر نہیں ڈال سکتی۔ماسکو میں روسی ہم منصب سرگئی لارووف کے ساتھ مشترکہ پریس کانفرنس میں ایرانی وزیر خارجہ کا کہنا تھا کہ مذاکرات میں رکاوٹ مسائل کے حل اور فریقین کے جوہری معاہدوں پر واپسی کی راہ ہموار کر سکتی ہے۔وزیر خارجہ سرگئی لاروف کا کہنا ہے کہ روس کی طرف سے جوہری معاہدہ بحالی کی کوششوں میں رکاوٹ ڈالنے کا امریکی دعویٰ غلط ہے، واشنگٹن نے روس ایران تجارت جاری رہنے کی تحریری یقین دہانی کرائی۔انھوں نے کہا کہ تحریری ضمانتیں ایرانی جوہری پروگرام پر معاہدہ بحالی کے متن میں موجود ہیں، ماسکو میں ایرانی ہم منصب کے ساتھ مشترکہ نیوز کانفرنس میں سرگئی لاروف کا کہنا تھا کہ امریکا نے ماسکو کے خلاف پابندیوں کے جوہری معاہدے کے فریم ورک کے اندر تعاون میں رکاوٹ نہ بننے کا کہا تھا۔ان کا کہنا تھا کہ روس ایران کا مشترکہ مؤقف ہے کہ مغربی پابندیاں بین الاقوامی قانون کی پامالی کرتی ہیں، پابندیوں سے واشنگٹن اور اس کے شراکت دار بنیادی طور پر عام شہریوں کو سزائیں دے رہے ہیں۔