جنگ بندی پر بات چیت میں کوئی پیش رفت نہیں ہوئی، اسامہ حمدان

بیروت : حماس کے سینیئر عہدیدار اسامہ حمدان نے کہا ہے کہ اسرائیل کے ساتھ غزہ میں جنگ بندی پر بات چیت میں کوئی پیش رفت نہیں ہوئی ہے۔ بیروت میں ایک نیوز کانفرنس کے دوران اسامہ حمدان نے کہاکہ حماس جنگ بندی کی کسی بھی مثبت تجویز پر بات چیت کیلئے تیار ہے۔ انہوں نے الزام لگایا کہ امریکا حماس پر جنگ بندی کی اسرائیلی تجاویز قبول کرنے کے لیے دباؤ ڈال رہا ہے۔ حالانکہ یہ تجاویز وحشیانہ اسرائیلی جارحیت کو مکمل طور پر روکنے کے حماس کے مطالبے کو پورا نہیں کرتی ہیں۔ اسامہ حمدان نے کہا کہ امریکا کا دباؤ ہے کہ اسرائیلی تجاویز کو بغیر کسی ترمیم کے قبول کیا جائے۔ جو اسرائیلی حکومت کی گھناؤنی شبیہہ کو خوبصورت بنانے کا ایک طریقہ ہے۔ انہوں نے کہا کہ قحط غزہ کی پٹی میں خاص طور پر غزہ شہر اور شمالی علاقوں میں فلسطینیوں کی زندگیوں کیلئے خطرہ بنا ہوا ہے۔ انہوں نے الزام لگایا کہ اسرائیل خوراک، پانی، ادویات اور ایندھن کی فراہمی کی اجازت نہیں دے رہاہے۔