Raza Musani 
واشنگٹن : صیہونی وزیرِاعظم نیتن یاہو کا کہنا ہے کہ غزہ میں مجوزہ ساٹھ روزہ جنگ بندی شروع ہو گی تو مستقل جنگ ختم کرنے کے لیے بات چیت کریں گے۔ صیہونی وزیراعظم نیتن یاہو نے واشنگٹن سے ایک ویڈیو بیان میں کہا کہ حماس کا ہتھیار ڈالنا اسرائیل کی بنیادی شرائط میں سے ہے۔ حماس کی غزہ پر حکمرانی اور فوجی صلاحیتیں نہ ہونا بھی اسرائیل کی شرائط میں شامل ہے۔ نیتن یاہو نے کہا ہے کہ اسرائیلی شرائط 60 روز میں پوری ہو گئیں تو بہت اچھا ورنہ فوجی طاقت سے انہیں پورا کریں گے۔
ادھر امریکی ٹی وی سے انٹرویو میں نیتن یاہو نے کہا کہ ایران پر حملوں کا اثر صرف مشرق وسطیٰ پر نہیں بلکہ پوری دنیا پر پڑا ہے، سب نے اسے دیکھا ہے۔ تہران دوبارہ اپنا پروگرام شروع کرنے کی کوشش کر سکتا ہے نیتن یاہو نے کہا کہ امریکا اور اسرائیل کو اس مسئلے کو کینسر کی طرح لینا ہوگا۔ ہمیں اندازہ ہے کہ ایران کا افزودہ یورینیم زیر زمین کہاں دفن ہے۔
