ایم ڈبلیو ایم کا قائد شہید علامہ عارف الحسینی کی برسی پر مہدیؑ بر حق کانفرنس کا اعلان

اسلام آباد : قائد شہید علامہ عارف حسین الحسینی کی 34 ویں برسی پر مجلس وحدت مسلمین نے پریڈ گراونڈ اسلام آباد میں مہدیؑ برحق کانفرنس منعقد کرنے کا اعلان کردیا ۔ کانفرنس میں ملک بھر سے عاشقان امام مہدی علیہ السلام اور پیروان شہید عارف حسین الحسینی شرکت کرینگے۔ چیئرمین ایم ڈبلیو ایم علامہ راجہ ناصر عباس جعفری نے کہا کہ مرکزی کابینہ کے فیصلے کے مطابق شہید قائد ؒ کی برسی کی مناسبت سے مرکزی اجتماع 24 جولائی کو ہوگا۔ انہوں نے کہا کہ اس وقت دنیا ظلم و جور اور فساد سے پر ہو چکی ہے، بشریت کو درپیش ان مسائل و مشکلات سے نجات دلانے والی ذات پاک فقط امام زمان عج کی ہی ہے، انشاء اللہ اس سال شہید قائد ؒ کی برسی کے مرکزی اجتماع میں ملک بھر سے لاکھوں عاشقان امام زمانہ عج اسلام آباد کی سرزمین پر اکھٹا ہوں گے اور وہ اپنے محبوب قائد کو خراج تحسین پیش کرنے کے ساتھ ساتھ اپنے امام عصر عج سے تجدید بیعت کریں گے۔ انہوں نے کہا کہ ملک بھر سے جمع ہونے والے عاشقان امام مہدیؑ اجتماعی طور پر عالمی استغاثہ سلام فرماندہ بحضور امام زمانہ عج پیش کرینگے۔