ایم ڈبلیو ایم اور پی ٹی آئی کا گلگت بلتستان الیکشن کیلئے اتحاد کا فیصلہ

گلگت : مجلس وحدت مسلمین اور پاکستان تحریک انصاف نے گلگت بلتستان اسمبلی کے آئندہ انتخابات میں اتحاد کا اصولی فیصلہ کرلیا۔ گلگت بلتستان کے عام انتخابات کے سلسلے میں مجلس وحدت مسلمین اور پاکستان تحریک انصاف کے پارلیمانی بورڈ کا مشترکہ اجلاس منعقد ہوا۔ جس میں انتخابی اتحاد اور حلقہ وار سیٹ ایڈجسٹمنٹ پر اتفاق کیا گیا۔
تمام حلقوں کی سیٹ ایڈجسٹمنٹ کا حتمی اعلان چند روز میں بیرسٹر گوہر خان اور علامہ راجہ ناصر عباس جعفری کریں گے۔
ایم ڈبلیو ایم کی جانب سے اجلاس میں انچارج پولیٹیکل سیل اسد نقوی، سابق اپوزیشن لیڈر جی بی اسمبلی محمد کاظم میثم، ممبر جی بی کونسل شیخ احمد علی نوری، عارف حسین قمبری نے شرکت کی جبکہ پی ٹی آئی کی جانب سے بورڈ کے چیئرمین خالد خورشید، ایپکس کمیٹی ممبر و اسپیکر کے پی اسمبلی سلیم سواتی اور ممبر بشیر احمد خان شریک ہوئے۔ اجلاس میں دونوں جماعتوں نے باہمی تعاون کے ساتھ انتخابی حکمت عملی آگے بڑھانے پر اتفاق کیا۔ دونوں پارلیمانی بورڈز انتخابی فارمولے کے سلسلے میں اپنی جماعتوں کو اعتماد لینے کے بعد پارٹی ٹکٹ کا اعلان ہوگا۔