مسلم ممالک اپنی سلامتی کیلئے بیرونی انحصار ختم کریں، عراقچی

تہران: ایرانی وزیرِ خارجہ عباس عراقچی نے مسلم ممالک پر زور دیا ہے کہ وہ اپنی سلامتی کے لیے بیرونی طاقتوں پر انحصار ختم کریں۔ علاقائی ممالک متحد ہو کر بیرونی مداخلت کا مقابلہ کر سکتے ہیں۔ عباس عراقچی نے کہا ہے کہ اب وقت آگیا ہے کہ مسلم ممالک اپنے وسائل اور صلاحیتوں پر انحصار کریں۔ انہوں نے مسلم ممالک پر زور دیا کہ حقیقی بھائی چارے اور باہمی تعاون کو فروغ دیا جائے۔ عراقچی کے مطابق خلیج فارس کی سلامتی بیرونی فوجی طاقتوں کے بجائے خطے کے ممالک کو خود یقینی بنانی چاہیے۔
ایرانی نائب وزیرِ خارجہ کاظم غریب آبادی نے بھی کہا کہ خطے کے تمام ممالک کو سیکیورٹی کے معاملات میں شریک ہونا چاہیے۔کاظم غریب آبادی کے مطابق جنوبی خلیجی ممالک میں اس بات پر اتفاق رائے پیدا ہوا ہے کہ علاقائی سلامتی کے مسائل خود خطے کے ممالک کو حل کرنے چاہیے۔ عباس عراقچی نے ایرانی مسلح افواج کی صلاحیتوں کو سراہتے ہوئے کہا کہ انہوں نے اپنی تیاری اور طاقت کا مظاہرہ کیا ہے۔