مغربی کنارے میں آباد کاری میں توسیع قبول نہیں، مسلم و عرب تنظیمیں

جدہ : رابطہ عالم اسلامی، عرب لیگ اور خلیج تعاون کونسل نے مغربی کنارے میں یہودی آباد کاری میں توسیع کے اسرائیلی فیصلے کی مذمت کی ہے۔ رابطہ عالم اسلامی سیکریٹریٹ سے جاری بیان میں صیہونی فوج کی جانب سے بین الاقوامی قوانین اور بین الاقوامی قراردادوں کی مسلسل خلاف ورزیوں کی مذمت کی گئی ہے۔ بیان میں خطے اور دنیا میں سلامتی اور استحکام کے لیے اسرائیل کی اُن خلاف ورزیوں سے خبردار کیا گیاہے جس سے منصفانہ اور جامع امن کے حصول کی کوششوں کو نقصان پہنچا ہے۔ دوسری جانب خلیج تعاون کونسل کے سیکریٹری جنرل جاسم البداوی نے بھی ایک بیان میں اسرائیلی فیصلے کی مذمت کی ہے۔ انہوں نے کہا کہ اسرائیلی حکام کی جانب سے خطرناک پالیسوں کا تسلسل خطے میں عدم استحکام کا باعث بنے گا۔ عرب لیگ کے سیکریٹری جنرل احمد ابو الغیث نے اسرائیلی فیصلوں کو اوسلو معاہدے سے بغاوت قرار دیا ہے۔ انہوں نے کہا کہ اسرائیلی اقدامات کا مقصد پوری صورت حال کو زیرو پوائنٹ تک لے جانا اور فلسطینی سرزمین پر اسرائیلی قبضے کو مضبوط کرنا ہے۔ اُنہوں نے کہاکہ اسرائیل کی انتہائی دائیں بازو کی نسل پرست حکومت امن میں دلچسپی نہیں رکھتی ہے۔ عالمی برادری کو اسرائیلی اقدامات کا نوٹس لینا چاہئے۔