اسرائیلی قتل عام میں 18 ہزار سے زائد بچوں سمیت 51 ہزار سے زائد فلسطینی شہید

غزہ : صیہونی فوج نے غزہ میں بارہ ہزار اجتماعی قتل عام میں اکاون ہزار سے زائد فلسطینی شہید کردئے۔ فلسطینی میڈیا آفس نے جارحیت کے 560 دن پورے ہونے پر جانی اور مالی نقصانات کے اعداد وشمار جاری کر دیے ہیں۔ رپورٹ کے مطابق شہداء میں 18 ہزار سے زائد بچے اور 12 ہزار 400 سے زائد خواتین شامل ہیں۔ ڈاکٹروں سمیت طبی عملے کے چودہ سو دو ارکان، 113 شہری دفاع کے کارکنان، 211 صحافی اور 748 سیکیورٹی اہلکار اور 13 ہزار طلبا کو اسرائیلی فورسز نے سفاکی اور بے رحمی سے شہید کیا۔
رپورٹ کے مطابق اسرائیلی فوج نے 6 ہزار 180 نفوس پر مشتمل دو ہزار 172 خاندانوں کو صفحہ ہستی سے مٹادیا جبکہ غزہ میں 11 ہزار فلسطینی تاحال لاپتہ ہیں۔ رپورٹ کے مطابق شہدا کی لاشیں 7 اجتماعی قبروں سے برآمد کی گئیں۔ ایک لاکھ 16 ہزار 505 فلسطینی زخمی ہوئے جن میں 409 زخمی صحافی اور میڈیا کارکنان ہیں۔