دیر البلاح میں مسجد پر میزائل حملہ، 24 بے گھر فلسطینی شہید

غزہ : صیہونی فوج نے غزہ کے علاقے دیر البلاح میں مسجد کو میزائل سے اڑادیا۔ جس میں چوبیس فلسطینی شہید اور 94 زخمی ہوگئے۔ غزہ میں صیہونی درندگی میں کوئی کمی نہ آسکی۔ دیر البلاح میں رات گئے میزائل داغ دیا گیا جس سے مسجد تباہ ہوگئی ۔ شہدا اور زخمیوں میں بڑی تعداد خواتین اور بچوں کی ہے۔ صیہونی فوج نے ایک بار پھر بھونڈا الزام لگایا ہے کہ مسجد کو حماس کے کمانڈ اینڈ کنٹرول کمپلیکس کے طور پر استعمال کیا جا رہا تھا۔ جبکہ وہاں بےگھر افراد مقیم تھے۔
دوسری جانب شمالی غزہ میں اقوام متحدہ کے امدادی سرگرمیوں سے متعلق ادارے کے دفتر پر بھی گولہ باری کی گئی ہے جس سے کئی افراد شہید اور زخمی ہوئے ہیں۔ غزہ ہی میں الزیتون اور الصابرہ محلوں کو بھی نشانہ بنایا گیا جس سے 37 افراد شہید اور کئی زخمی ہوگئے۔ ادھر صیہونی فوج نے فلسطینیوں کو المواصی اور خان یونس کو خالی کرنے کا حکم دے دیا۔
ادھر غزہ میں وزارت مذہبی امور نے کہا ہےکہ ایک سال میں اسرائیل نے غزہ کی 1,245 مساجد میں سے 814 کو مسمار کردیا جبکہ 148 کو شدید نقصان پہنچا ہے۔ تین گرجا گھروں کو بھی تباہ کیا گیا اور 60 قبرستانوں میں سے 19 کو جان بوجھ کر نشانہ بنایا گیا۔