شہید ابراہیم رئیسی و رفقاء کے جلوس جنازہ میں لاکھوں افراد امڈ آئے

قم المقدس : ایران کے شہر تبریز اور قم میں صدر ابراہیم رئیسی و رفقاء کے جلوس جنازہ میں لاکھوں افراد امڈ آئے۔ تبریز میں ابراہیم رئیسی اور ان کے ساتھیوں کی نماز جنازہ میں لاکھوں افراد شریک ہوئے۔ جلوس جنازہ کے موقع پر جذباتی مناظر بھی دیکھنے میں آئے۔ جلوس جنازہ میں شریک سوگواروں نے پوسٹرز اور صدر کی تصاویر اٹھا رکھی تھیں۔ شرکاء جنازہ پر گل پاشی کر کے اپنے محبوب صدر کو الوداع کہہ رہے تھے۔
نماز جنازہ کے بعد میتوں کو مقدس شہر قم لایا گیا۔ یہاں بھی لاکھوں سیاہ پوش سوگواروں نے میتوں کا خیرمقدم کیا۔ جلوس جنازہ میں بڑی تعداد میں اعلیٰ سیاسی و عسکری حکام بھی شریک تھے۔ قم کے بعد میتوں کو تہران بھیج دیا گیا جہاں کل صبح تہران یونیورسٹی میں نماز جنازہ ادا کی جائے گی۔
ولی امر مسلمین آیت اللہ سید علی خامنہ ای نماز کی اقتدا کریں گے۔ شہید آیت اللہ رئیسی کی تدفین جمعرات کو روضہ امام رضا علیہ السلام کے احاطے میں ہوگی۔