Raza Musani 
جنیوا : یونیسیف نے جبالیہ میں اڑتالیس گھنٹوں میں پچاس بچوں کی شہادت کو خوفناک اسرائیلی جنگ کا ایک اور سیاہ باب قرار دیا ہے۔ یونیسیف کی ایگزیکٹیو ڈائریکٹر کیتھرین رسل نے کہا ہے کہ اسرائیلی فورسز نے نہ صرف بڑی تعداد میں فلسطینیوں کو شہید کیا، جن میں بچے بھی شامل تھے، بلکہ انسانی امداد میں بھی کمی کردی اور اقوام متحدہ کے عملے پر بھی حملہ کیا۔ انہوں نے کہا کہ یہ پہلے ہی شمالی غزہ میں حملوں کا ایک مہلک ویک اینڈ رہا ہے۔ انہوں نے انسانی ہمدردی کے کارکنوں کو درپیش خطرات پر بھی روشنی ڈالی، خاص طور پر پولیو ویکسینیشن جیسی حساس مہم میں شامل افراد کی زندگی کو لاحق خطرات کو اجاگر کیا۔ کیتھرین رسل نے کہا کہ شمالی غزہ میں دیگر حملوں سے بچوں کی ہلاکتوں کی ہولناک سطح کے ساتھ ساتھ تازہ ترین واقعات اس خوفناک جنگ کے تاریک ترین پہلو ہیں۔ انہوں نے اس بات پر زور دیا کہ بین الاقوامی انسانی قانون تنازعات کے دوران شہریوں، شہری ڈھانچے، انسانی ہمدردی کے کارکنوں اور ان کی گاڑیوں کے تحفظ کو لازمی قرار دیتا ہے۔
