Raza Musani 
گلگت : مجلس وحدت مسلمین گلگت بلتستان نے 12 جون کو یادگار شہداء پر استحکام پاکستان اور عظمت شہداء کانفرنس منعقد کرنے کا اعلان کیا ہے۔ یہ فیصلہ اسکردو میں صوبائی صدر آغا علی رضوی کی زیر صدارت صوبائی و ضلعی کابینہ کے اجلاس میں کیا گیا۔ اجلاس سے خطاب میں آغا علی رضوی نے ملک میں بڑھتی ہوئی بد امنی، بم دھماکے اور شیعہ جوانوں کی ماورائے عدالت جبری گمشدگیوں کی نئی لہر کو بیرونی مداخلت کا شاخسانہ قرار دیتے ہوئے گہری تشویش کا اظہار کیا۔شرکا نے امریکی مداخلت، شیعہ جوانوں کی جبری گمشدگی، گلگت بلتستان میں عوامی زمینوں کی بندر بانٹ کے خلاف اور سانحہ 1988 سے لیکر سانحہ پشاور تک بے گناہ شہیدوں کو خراج تحسین پیش کرنے کیلئے استحکام پاکستان اور عظمت شہداء کانفرنس کی منظوری دی۔ شرکا نے نو منتخب چیئرمین مجلس وحدت مسلمین پاکستان علامہ راجہ ناصر عباس جعفری صاحب کو مبارک باد دی اور بھر پور اعتماد کا اظہار کرتے ہوئے آپ کی بابصیرت قیادت میں منظم ہوکر چلنے کا تجدید عہد کیا- شرکاء نے امامیہ طلباء کو جدوجہد کے پچاس سال مکمل کرنے پر مبارک باد پیش کی- شہید ڈاکٹر محمد نقوی اور دیگر شہداء کو خراج عقیدت پیش کیا۔
