Raza Musani 
لاہور: شہر لاہور میدان جنگ بن گیا۔ مبینہ پولیس تشدد سے تحریک انصاف کا ایک کارکن جاں بحق اور درجنوں زخمی ہوگئے۔ پنجاب کی نگراں حکومت نےسابق وزیراعظم عمران خان کی ریلی روکنے کیلئے دفعہ 144 نافذ کردی اور ریلی میں آنے والے کارکنوں پر کریک ڈاؤن کیا۔ پولیس کے تشدد اور شیلنگ سے متعدد کارکنان زخمی ہوگئے ۔ ایک کارکن بلال اسپتال پہنچ کر دم توڑ گیا۔ پی ٹی آئی نے دعویٰ کیا کہ پولیس نے واٹر کینن کے ذریعے ہمارے کارکنوں پر کیمیکل ملا پانی پھینکا۔پولیس کی پکڑ دھکڑ کے پیش نظر عمران خان نے ریلی ختم کرنے کا اعلان کردیا۔ پولیس ترجمان کے مطابق مظاہرین کے تشدد سے کئی جوان شدید زخمی ہوئے جن میں سے ایک کی حالت تشویشناک ہے۔ پولیس نے پیش قدمی کرنے والے متعدد کارکنان کو گرفتار بھی کرلیا۔ پی ٹی آئی نے داتا دربار سے ریلی نکالنے اور انتخابی مہم شروع کرنے کا اعلان کیا تھا تاہم حکومت کی جانب سے دفعہ ایک سو چوالیس نافذ کردی گئی۔
