Raza Musani 
پیٹرولیم مصنوعات پر لیوی ٹیکس اور مہنگائی کے خلاف جماعت اسلامی کا لاہور میں دھرنا 16 ویں روز بھی جاری ہے۔ دھرنے کے باعث چیئرنگ کراس فیصل چوک کو عام ٹریفک کے لئے بند رکھا گیا ہے۔ دھرنے میں کارکنوں اور رہنماؤں کی آمد و رفت کا سلسلہ دن بھر جاری رہتا ہے۔ دوسری جانب جماعت اسلامی کی تین ستمبر کو ہڑتال کامیاب کرانے کے لیے تاجر رہنماوں کے ساتھ ملاقاتیں جاری ہیں۔ ترجمان جماعت اسلامی کا کہنا ہے کہ پٹرولیم مصنوعات پر لیوی ٹیکس کے خاتمے تک احتجاجی دھرنا جاری رہے گا۔
انہوں نے کہا کہ گزشتہ رات جماعت اسلامی کی جانب سے راولپنڈی لیاقت باغ میں جلسہ کیا گیا، جماعت اسلامی کی احتجاجی تحریک کا آئندہ لائحہ عمل اسلام آباد لانگ مارچ کی کال ہوگا۔ ترجمان جماعت اسلامی نے بتایا کہ تین ستمبر کی ہڑتال کے بعد ملک بھر سے کارکن لاہور پہنچیں گے اور لاہور سے اسلام آباد کیلئے لانگ مارچ کیا جائے گا اور اسلام آباد میں پارلیمنٹ ہاوس کے سامنے دھرنا دیا جائے گا۔ ترجمان کا کہنا تھا کہ پٹرولیم مصنوعات پر لیوی ٹیکس، آئی پی پیز کو ادائیگیاں سب دھونس، دھاندلی اور لوٹ مار ہے، یہ غریب عوام کے جیبوں پر ڈاکہ ہے۔ انہوں نے کہا کہ جب تک لیوی ٹیکس کا خاتمہ نہیں ہوتا اور آئی پی پیز کو ادائیگیاں بند نہیں ہوتیں، ہمارا احتجاج جاری رہے گا۔
