یہ طوفان سے پہلے کی خاموشی ہے، ٹرمپ کی ایران کو نئی دھمکی

واشنگٹن : امریکی صدر ڈونلڈ ٹرمپ نے ایران کا نام لیے بغیر دھمکی آمیز پیغام میں کہا ہے کہ یہ طوفان سے پہلے کی خاموشی ہے۔ امریکی صدر ٹرمپ نے کہا ہے کہ ایران کے مفاد میں ہے کہ وہ جلد امن معاہدے تک پہنچے ۔جلد امن معاہدہ نہ ہوا تو تہران کو بہت برے وقت کا سامنا کرنا پڑے گا۔
فرانسیسی نشریاتی ادارے بی ایف ایم ٹی وی کو ٹیلیفونک انٹرویو میں امریکی صدر ڈونلڈ ٹرمپ نےکہا کہ تہران معاہدے تک پہنچنے میں دلچسپی رکھتا ہے کیونکہ یہی اس کے مفاد میں ہے۔ ٹرمپ نے کہا کہ انہیں نہیں معلوم کہ معاہدہ جلد ہو پائے گا یا نہیں۔ تاہم اگر مذاکرات ناکام ہوئے تو ایران کے لیے صورتحال انتہائی خراب ہو سکتی ہے۔ امریکی صدر کے مطابق ایران کے جوہری پروگرام اور جاری تنازع کے حل کے لیے کوششیں جاری ہیں لیکن اب تک کوئی حتمی پیش رفت سامنے نہیں آئی۔ متعدد میڈیا رپورٹس کے مطابق ڈونلڈ ٹرمپ آئندہ چند گھنٹوں میں یہ فیصلہ کر سکتے ہیں کہ ایران کے خلاف دوبارہ حملے کیے جائیں یا نہیں۔