Raza Musani 
برسلز : یورپی یونین نے غزہ میں اسرائیل کی جانب سے نام نہاد اورنج لائن کے ذریعے زمینی کنٹرول بڑھانے کو مسترد کر دیا ہے۔ یورپی یونین کے ترجمان انور الانونی نے کہا کہ غزہ کی سرحدی یا علاقائی حیثیت میں کسی بھی تبدیلی کو قبول نہیں کیا جائے گا۔ انہوں نے واضح کیا کہ یورپی یونین غزہ اور مغربی کنارے کو فلسطینی اتھارٹی کے تحت یکجا دیکھنا چاہتی ہے۔ ترجمان کے مطابق اسرائیل کی نئی اورنج لائن پالیسی غزہ کے ساٹھ فیصد سے زائد علاقے پر کنٹرول بڑھانے کی کوشش ہے۔ انہوں نے کہا کہ یہ اقدام جنگ بندی معاہدے کی خلاف ورزی ہے،جس کے تحت اسرائیل کو انخلا کرنا تھا۔ انور الانونی نے اسرائیل سے مطالبہ کیا کہ انسانی امداد کی بلا رکاوٹ اور بڑے پیمانے پر رسائی یقینی بنائی جائے۔ امداد کی مستقل اور مؤثر تقسیم بھی ضروری ہے تاکہ متاثرہ فلسطینیوں کو ریلیف مل سکے۔
