Raza Musani 
تل ابیب : اسرائیلی انسانی حقوق تنظیم بیت سیلم نے عالمی برادری سے مطالبہ کیا ہے کہ مقبوضہ مغربی کنارے میں اسرائیل کی نسلی صفائی روکنے کے لیے ہر ممکن اقدام کیا جائے۔ بیت سیلم نے سوشل میڈیا پر جاری بیان میں کہا کہ عالمی برادری کو مقبوضہ مغربی کنارے میں جاری اسرائیلی اقدامات کے خلاف مؤثر کردار ادا کرنا چاہیے۔ مزید فلسطینی آبادیوں کو بے گھر ہونے سے بچانے کے لیے فوری بین الاقوامی دباؤ ضروری ہے۔ تنظیم کے مطابق 17 سفارتی وفود نے علاقے کا دورہ کیا اور ان فلسطینی خاندانوں سے براہ راست ملاقات کی جنہیں اسرائیل بے دخل کرنے کی دھمکیاں دے رہا ہے۔ تنظیم بیت سیلم نے کہا کہ سفارت کاروں نے زمینی حقائق کا خود مشاہدہ کیا اور متاثرہ افراد کے حالات سنے۔ تنظیم نے خبردار کیا کہ اگر فوری بین الاقوامی دباؤ نہ ڈالا گیا تو مزید فلسطینی برادریاں اپنے گھروں اور زمینوں سے محروم ہو سکتی ہیں۔
