اسرائیلی درندگی، اسکولوں، خیمہ بستی، عمارتوں پر حملے، خواتین و بچوں سمیت 70 فلسطینی شہید

غزہ :غزہ میں اسکولوں، خیمہ بستی اور رہائشی عمارتوں پر حملوں میں مزید 74 فلسطینی شہید ہوگئے۔شمالی غزہ میں اسرائیلی فوج کے حملے میں انروا کے زیر انتظام دو اسکول تباہ ہوگئے اور سترہ فلسطینی شہید ہوگئے۔ ساحلی علاقوں میں قائم خیمہ بستیوں پر بھی غاصب اسرائیلی فوج نے حملے تیز کردیئے ہیں۔ اسرائیلی فوج نے خان یونس، المغازی سمیت کئی ساحلی بستیوں پر حملے کئے۔ بیت لاہیہ اور جبالیہ میں مکانات کو نشانہ بنایا گیا۔
ادھر دیرالبلاح اور المغازی سے انخلاء کے حکم کے ساتھ حملوں سے افراتفری پھیل گئی۔ صیہونی فوج دیر البلاح میں مشرقی سمت سے پیشرفت کررہی ہے۔ چند گھنٹوں میں ہزاروں افراد بے سرو سامانی کے عالم میں محفوظ مقام کی تلاش میں دربدر ہوگئے۔ انخلا کے حالیہ احکامات سے متاثرین شدید مشکلات سے دوچار ہوگئے۔ انروا نے کہا ہےکہ غزہ میں باقی رہ جانے والے پانی کے کنویں اور صفائی کی سہولیات ان علاقوں میں ہیں جنہیں خالی کرنے کا حکم دیا گیا جس سے پانی کا بحران شدید ہونے کا خدشہ ہے۔ ادھر مغربی کنارے کے علاقے تلکرم میں اسرائیل کارروائی میں تین فلسطینی مارے گئے۔