اسرائیلی حکام غزہ میں جنگی جرائم کے ذمہ دار ہیں، اقوام متحدہ

جنیوا: اقوام متحدہ کے انسانی حقوق کمیشن نے قرار دیا ہے کہ اسرائیلی حکام غزہ میں جنگی جرائم اور انسانیت کے خلاف جرائم کے ذمہ دار ہیں۔ مقبوضہ فلسطینی سرزمین سے متعلق انڈیپنڈنٹ انٹرنیشنل کمیشن آف انکوائری نے غزہ میں جنگی جرائم سے متعلق رپورٹ جاری کی ہے۔ جنیوا میں نیوز کانفرنس کے دوران کمیشن کی چیئر پرسن نوی پلے نے کہا کہ اسرائیل نے غزہ کی پوری آبادی کو زبردستی چھوٹے سے علاقے میں دھکیل دیا ہے جو غیر محفوظ اور ناقابل رہائش ہے۔ انہوں نے کہا کہ گنجان آبادی والے علاقوں میں تباہ کن صلاحیت کے حامل بھاری ہتھیاروں کا جان بوجھ کر استعمال شہری آبادی پر براہ راست حملہ ہے۔ انہوں نے الزام لگایا کہ حماس اور دیگر فلسطینی مسلح گروپوں نے بھی جنگ کے دوران جنسی تشدد سمیت وسیع جنگی جرائم کا ارتکاب کیا۔ کمیشن کی سربراہ نے غزہ میں جنگ بندی، محاصرے کے مکمل خاتمے، تمام قیدیوں کی رہائی کے مطالبے کا اعادہ کیا اور کہاکہ تمام فریقوں کو شہریوں اور شہری اشیاء کی حفاظت کرنی چاہیے اور اقوام متحدہ کی ایجنسیوں اور انسانی حقوق کے لیے کام کرنے والوں کے خلاف حملوں کو روکنا چاہیے۔ کمیشن نے اسرائیل سے مطالبہ کیا ہے کہ وہ انٹرنیشنل کورٹ آف جسٹس کے جاری کردہ حکم کی تعمیل میں تحقیقات اور شواہد کو محفوظ رکھنے کے لیے کمیشن کی غزہ کی پٹی تک فوری رسائی کو یقینی بنائے۔