Raza Musani 
تل ابیب: اسرائیلی اخبار ہاریٹز نے انکشاف کیا ہےکہ اسرائیلی حکام نے سترہ سو فلسطینیوں کی لاشیں قبضے میں رکھی ہوئی ہیں تاکہ انہیں مستقبل میں سودے بازی کے لیے استعمال کیا جاسکے۔ اسرائیلی اخبار کے مطابق فلسطینیوں کی سینکڑوں لاشوں کی موجودگی کا انکشاف حالیہ سکیورٹی اجلاسوں کے دوران ہوا۔
رپورٹ کے مطابق زیادہ تر لاشیں غزہ سے تعلق رکھنے والے فلسطینیوں کی ہیں۔ جنہوں نے سات اکتوبر دو ہزار تئیس کے حملے یا اس کے بعد کی لڑائی میں حصہ لیا تھا۔ ان لاشوں میں بعض ایسے فلسطینیوں کی بھی ہیں جو لڑائی میں شریک نہیں ہوئے تھے۔ شن بیت کے سربراہ ڈیوڈ زینی اور اسرائیلی فوجی حکام مستقبل میں اسرائیلی یرغمالیوں یا لاپتہ افراد کے معاملے میں ان لاشوں کو سودے بازی کے لیے رکھنے کے حامی ہیں۔ قانونی ماہرین کا کہنا ہے کہ اسرائیلی ریاست کو ان فلسطینیوں کی لاشیں رکھنے کا قانونی اختیار حاصل نہیں، جن کی لڑائی میں شرکت ثابت نہیں ہوئی۔
