Raza Musani 
غزہ :غزہ میں اسرائیلی بمباری سے چوبیس گھنٹوں میں مزید تینتالیس فلسطینی شہید ہوگئے ہیں۔ اسرائیلی فوج نے جنوبی اور شمالی غزہ پر متعدد فضائی اور زمینی حملے کیے ہیں۔خان یونس میں حملوں میں ایک ہی خاندان کے بارہ افراد شہید ہوئے۔ جبالیہ مہاجر کیمپ میں اسرائیلی فوج نے متاثرین کے کیمپ پر بمباری کی جس میں دس افراد جان سے گئے۔ دیرالبلاح میں اسپتال کے قریب حملے میں پانچ بچے شدید زخمی ہوگئے جن میں سے دو بچے اسپتال میں زخموں کی تاب نہ لاتے ہوئے شہید ہوگئے ہیں۔
ادھر وسطی غزہ میں پولیو سے بچاؤ کے قطرے پلانے کی مہم چوتھے روز بھی جاری ہے۔ عالمی ادارہ صحت ڈبلیو ایچ او نے کہا ہے کہ ہیلتھ ورکرز تین دنوں میں توقع سے زیادہ بچوں تک پہنچ چکے ہیں اور انسداد پولیو مہم چوتھے روز بھی جاری رہے گی۔ ڈبلیو ایچ او کے سربراہ ٹیڈروز نے عالمی برادری سے کہا ہے کہ وہ اسرائیل پر پولیو ورکرز کا تحفظ یقینی بنانے کے لئے دباؤ ڈالے۔ فلسطینی وزیر صحت ماجد ابو رمضان نے کہا ہے کہ غزہ میں صحت کی سہولیات مکمل تباہ ہوچکی ہیں۔ پولیو مہم کو کامیاب بنانے کیلئے عالمی برادری اسرائیل پر دباؤ میں اضافہ کرے۔
