Raza Musani 
غزہ : اسرائیلی فوج نے شمالی غزہ کے علاقے جبالیہ میں ایک اپارٹمنٹ کو نشانہ بنایا ہے۔ فلسطینی شہری دفاع کے حکام کے مطابق جبالیہ میں نشانہ بنائے گئے اپارٹمنٹ کو اسرائیلی فوج نے محفوظ علاقہ قرار دیا تھا۔ جس کی وجہ سے بڑی تعداد میں پناہ گزین اپارٹمنٹ میں پناہ لیے ہوئے تھے۔بغیر کسی اطلاع کے اسرائیلی فوج نے اپارٹمنٹ پر اچانک حملہ کردیا جس کی وجہ سے حملے میں درجنوں افراد شہید و زخمی ہوگئے۔ شہدا میں بچے اور خواتین بڑی تعداد میں شامل ہیں۔
ادھر صیہونی فوج نے دیرالبلاح سمیت جنوبی غزہ سے بھی متاثرین کے انخلا کے نئے احکامات جاری کردیے ہیں ۔ المواصی سمیت جن علاقوں کیلئے احکامات جاری کئے گئے ان میں بعض علاقوں کو اسرائیل محفوظ زون قرار دے چکا ہے۔ اسرائیلی فوج کی جانب سے کہا گیا ہے کہ دیرالبلاح سے راکٹ فائر کرنے کے بعد سیف زون کو ختم کرنے کا فیصلہ کیا گیا ہے۔ دوسری جانب فلسطینیوں کا موقف ہے کہ اسرائیل خان یونس کا علاقہ صیہونی آباد کاروں کی آباد کاری کے لیے خالی کرارہا ہے۔
