اسرائیلی جارحیت امریکا اور اتحادیوں کیلئے بھی نقصاندہ ہے، قطر

دوحہ : قطری وزیرِ اعظم محمد بن عبدالرحمن آل ثانی نے کہا ہے کہ اسرائیل کے جارحانہ اقدامات نہ صرف خطے کی سلامتی بلکہ امریکی مفادات اور شراکت داروں کے لیے بھی نقصان دہ ہیں۔ قطری وزیرِ اعظم آل ثانی نے امریکی ویب سائٹ بریٹبارٹ نیوز کو انٹرویو میں کہا کہ اسرائیل پورے مغربی ایشیا کے امن کے لیے خطرہ ہے ۔ اسرائیلی جارحیت خطے میں عدم استحکام پیدا کر رہی ہے اور امریکی مفادات کو بھی متاثر کر رہی ہے۔ انہوں نے مزید کہا کہ امریکی صدر ڈونلڈ ٹرمپ اس مسئلے کے حل کے لیے تیار ہیں اور عرب رہنماؤں کے ساتھ مل کر اس پر بات چیت کر رہے ہیں۔ آل ثانی نے زور دیا کہ کسی بھی ممکنہ حل کا آغاز غزہ سے ہونا چاہیے، جہاں جنگ کو فوری طور پر بند کرنا ضروری ہے تاکہ بچوں، خواتین اور عام شہریوں کی زندگیوں کا تحفظ یقینی بنایا جا سکے۔