اسرائیل کبھی اہداف حاصل نہیں کرسکے گا، شیخ نعیم قاسم

بیروت : حزب اللہ کے ڈپٹی سیکریٹری جنرل شیخ نعیم قاسم نے کہا ہے کہ لبنان کی مزاحمتی تحریک اب اسرائیلی حکومت کے خلاف جنگ کےنئے مرحلے میں داخل ہوگئی ہے۔ جنوبی بیروت میں حزب اللہ کے دو سینئر کمانڈروں کی آخری رسومات کے لیے جمع سوگواروں سے خطاب میں شیخ نعیم قاسم نے کہا کہ کہ دہشتگرد صیہونی حکومت نے پیجر دھماکوں کے ذریعے پانچ ہزار لبنانیوں کو قتل کرنے کی کوشش کی لیکن اس میں وہ ناکام رہی۔ انہوں نے کہا کہ اسرائیل نے ہمارے خیال میں تین دردناک جنگی جرائم کا ارتکاب کیا، جو کہ اس سے پہلے کبھی نہیں دیکھی گئی، یہ ظلم کی انتہا ہے۔ امریکہ اسرائیل کی جارحیت اور جرائم میں سر سے پاؤں تک شریک ہے۔انہوں نے کہا کہ ہم حزب اللہ ہیں، پہاڑ ٹوٹ کر بکھر جائے گا لیکن ہم ہمیشہ ثابت قدم رہیں گے۔ سید حسن نصر اللہ کے نائب نے اس بات پر زور دیا کہ دشمن کی دھمکیاں ہمیں کبھی خوفزدہ نہیں کر سکتی، ہم تمام حالات سے نمٹنے کے لیے تیار ہیں۔ انہوں نے مزید کہا کہ ہم کبھی یہ طے نہیں کریں گے کہ دشمن کو کیسے جواب دیا جائے، ہم ایک نئے مرحلے میں داخل ہو گئے ہیں جسے پورا حساب چکتا کرنے والی جنگ کہا جاتا ہے۔