اسرائیل غزہ میں امداد کی فراہمی کیلئے فوری اقدامات کرے، کینیڈا

اوٹاوا : کینیڈا نے اسرائیل سے غزہ میں امداد کی فراہمی کیلئے فوری اقدامات کا مطالبہ کردیا۔ کینیڈا کی وزیر خارجہ میلانیا جولی اور بین الاقوامی ترقی کے وزیر احمد حسین نے ایک مشترکہ بیان میں کہا کہ اسرائیل غزہ میں شہری آبادی کیلئے انسانی امداد کی فراہمی میں نمایاں اور مستقل اضافے کیلئے فوری اقدامات کرے۔ دونوں وزرا نے غزہ میں تباہ کن انسانی حالات کا حوالہ دیا جہاں شدید غذائی قلت جان لیوا سطح پر پہنچ چکی ہے۔ دونوں وزرا نے کہا کہ انسانی بنیادوں پر امداد نہ ملنے کی وجہ سے مرد، عورتیں اور بچے مر رہے ہیں۔ انہوں نے مزید کہا کہ اسرائیلی حکومت کو بین الاقوامی انسانی قانون کے تحت اپنی ذمہ داریوں کی پاسداری کرنی چاہیے۔