اسرائیل عالمی تنظیموں کے کام میں رکاوٹ سے باز رہے، سعودیہ

ریاض : سعودی عرب نے اسرائیل کو خبردار کیا ہے کہ اسے عالمی تنظیموں کے کام میں رکاوٹ پیدا کرنے سے باز رہنا چاہئے. سعودی وزارت خارجہ نے اقوام متحدہ کی ریلیف اینڈ ورکس ایجنسی اونروا کی سرگرمیوں پر قدغن لگانے اور اسے دہشت گرد تنظیم قرار دینے کے اسرائیلی فیصلے کی شدید مذمت کی ہے۔ سعودی وزارت خارجہ کے بیان میں کہا گیاہے کہ اسرائیل اپنے فیصلوں کے ذریعے اونروا کے عملے کو ذمہ داریوں کی انجام دہی کے سلسلے میں حاصل استثنیٰ کو ختم کرنا چاہتا ہے تاکہ ایجنسی کو ان خدمات کی انجام دہی سے باز رکھا جا سکے جو وہ فلسطینیوں کو درپیش تباہ کن مسائل سے پیدا ہونے والی صورت حال میں کمی لانے کی خاطر ادا کر رہا ہے۔ سعودی وزارت خارجہ نے کہا کہ اسرائیل کو ایک قابض ریاست کے طور پر عالمی اور بین الاقوامی جنگی قوانین کی پاسداری کرنی چاہیے۔