Raza Musani 
نیویارک: سلامتی کونسل کی نئی قرارداد میں اسرائیل سے مقبوضہ علاقوں میں صیہونی بستیوں کی توسیع فوری اور مکمل بند کرنے پر زور دیا گیا ہے۔ اقوام متحدہ کی سلامتی کونسل کا اجلاس پیر کو طلب کیا گیا ہے جس میں اسرائیل اور فلسطین کے درمیان بڑھتی ہوئی کشیدگی پر غور کیا جائے گا۔اجلاس میں پیش کرنے کیلئے قرارداد کا مسودہ تیا کرلیا گیا ہے جس میں اسرائیل سےمطالبہ کیا گیا ہے کہ وہ مقبوضہ فلسطینی سرزمین میں آباد کاری کی تمام سرگرمیاں فوری اور مکمل طور پر بند کردے۔ قرارداد میں اس بات کی توثیق کی گئی ہے کہ 1967 کےبعد مقبوضہ فلسطینی سرزمین پر بستیوں کےقیام کاکوئی قانونی جواز نہیں اور یہ بین الاقوامی قانون کی صریح خلاف ورزی ہے۔ قرارداد میں اسرائیلی آباد کاری کی تمام سرگرمیوں اور دیگر تمام یکطرفہ اقدامات کی مذمت کی گئی ہے جن کا مقصد 1967 سے مقبوضہ فلسطینی علاقے کی آبادی کی ساخت، کردار اور حیثیت کو تبدیل کرنا ہے۔
