اسرائیل کو قابض ریاست کے طور پر جوابدہ ہونا چاہئے، ڈیوڈ لیمی

لندن: برطانوی وزیرخارجہ ڈیوڈ لیمی نے کہا ہے کہ اسرائیل کو ایک قابض طاقت کے طور پر اپنی ذمہ داریوں کیلئے جوابدہ ہونا چاہئے۔ پارلیمنٹ میں خارجہ امور کی کمیٹی کے اجلاس میں سوالات کا جواب دیتے ہوئے ڈیوڈ لیمی نے غزہ میں جاری سنگین صورتحال کو انتہائی خوفناک قرار دیا۔ انہوں نے اسرائیل کی ذمہ داریوں کی نشاندہی کرتے ہوئے زور دیا کہ اسرائیل کو بین الاقوامی قانون کے تحت اپنی ذمہ داریوں کو یاد رکھنا چاہیے۔ مقبوضہ مغربی کنارے کے الحاق سے متعلق اسرائیلی وزیر کے بیان پر فارن سیکریٹری نےکہا کہ وہ اس بات کو یقینی بنانے کے لیے ہر ممکن کوشش کریں گےکہ ایسا نہ ہو۔ انہوں نے دو ریاستی حل کے برطانوی موقف کا اعادہ کرتے ہوئے خبردار کیا کہ غیر قانونی الحاق کی کوئی گنجائش نہیں ہے۔