Raza Musani 
جنیوا : اقوام متحدہ کی ایجنسی انروا نے کہا ہے اسرائیل نے غزہ میں نام نہاد انسانی ہمدردی کے زون کو کم کرکے صرف گیارہ فیصد تک محدود کر دیا ہے۔ انروا نے ایک بیان میں کہاہے کہ روزانہ ہزاروں خاندان بے گھر ہو رہے ہیں کیونکہ اسرائیلی حکام نے انخلاء کے نئے احکامات جاری کیے ہیں۔ نام نہاد انسانی ہمدردی کا زون سکڑ کر گیارہ فیصد تک رہ گیا ہے۔ جس سے بے گھر لوگوں میں بڑے پیمانے پر خوف و ہراس پھیل گیا ہے۔ بیان میں کہا گیاہےکہ ٹوٹی ہوئی کھڑکیوں۔ بکھرے گھروں اور بکھری زندگیوں کے سوا کچھ نہیں۔ لوگ نہ ختم ہونے والے ڈراؤنے خواب میں پھنسے ہوئے ہیں۔ انروا کے مطابق چوراسی فیصد علاقوں کو انخلاء کے احکامات کا سامنا ہے۔ انروا نے غزہ میں پولیو پھیلنے پر بھی تشویش کا اظہار کیا ہے اور کہا ہے کہ انسداد پولیو کے قطرے پلانے کی مہم کے لیے انسانی بنیادوں پر وقفہ ضروری ہے۔
اُدھر بین الاقوامی ریسکیو کمیٹی نے بھی بڑے پیمانے پر انخلا کے احکامات سے خاندانوں کے بچھڑنے میں اضافے کے خطرے کی گھنٹی بجادی ہے۔ گروپ نے کہا کہ جائزوں سے پتہ چلتا ہے کہ غزہ میں لاوارث بچوں کی تعداد یونیسیف کے 17 ہزار کے اندازے سے کہیں زیادہ ہے۔
