اسرائیل جنگ بندی ختم کرنے کے بہانے تلاش کر رہا ہے، اردوان

مناما : ترک صدر رجب طیب اردوان نے کہا ہے کہ حماس جنگ بندی کی پابندی کر رہی ہے۔ اسرائیل جنگ بندی ختم کرنے کیلئے بہانے تلاش کر رہا ہے۔ صدر اردوان نے استنبول میں ورلڈ فورم سے خطاب میں اسرائیل پر وعدے توڑنے کا الزام لگاتے ہوئے کہا کہ سب جانتے ہیں اسرائیل کے وعدے پورے کرنے کا ریکارڈ انتہائی خراب ہے، غزہ میں جنگ بندی برقرار رکھنا اور انسانی امداد پہنچانا انتہائی ضروری ہے۔ اردوان نے اسرائیل کی جانب سے بھوک کو ہتھیار کے طور پر استعمال کرنے، بچوں پر تشدد، اور صحافیوں کے قتل پر بھی تنقید کی۔ انہوں نے عالمی اداروں کی نااہلی پر سوال اٹھاتے ہوئے کہا کہ اقوام متحدہ کی جنرل اسمبلی کے فیصلے اکثر سیکیورٹی کونسل کے مفادات کے لیے قربان کر دیے جاتے ہیں۔ ترک صدر نے کہا کہ غزہ کی تعمیرنو اسی وقت ممکن ہے جب اسرائیل پر دباؤ ڈالا جائے غزہ مکمل طور پر تباہ ہو چکا ہے اسکول، چرچ، مسجدیں اور اسپتال سب نشانہ بنے، کہتے ہیں اسرائیل بےقصور ہے، کیسے؟۔