اسماعیل ہنیہ کو بم سے نہیں میزائل سے نشانہ بنایا گیا، حماس

بیروت : فلسطینی مزاحمتی تنظیم حماس نے اپنے قائد اسماعیل ہنیہ کی ٹارگٹ کلنگ پر صیہونی دعویٰ مسترد کردیا۔ حماس نے اسرائیلی دعوؤں کو اس کی طرف سے پھیلائے گئے جھوٹ کے سلسلے کا حصہ قرار دیا۔ حماس نے ایک بیان میں کہا ہے کہ گروپ اور ایرانی سیکیورٹی ایجنسیوں کی تحقیقات سے یہ نتیجہ اخذ کیا گیا ہے کہ ہنیہ کو تہران میں کمرے میں نصب بم سے نہیں بلکہ ساڑھے سات کلو وزنی گائیڈڈ میزائل کے ذریعے نشانہ بنایا گیا۔ حماس نے اسرائیلی دعووں کو اس پیچیدہ جرم سے توجہ ہٹانے کی ایک مایوس کن کوشش قرار دیا ہے۔ اسرائیلی چینل 12 نے دعویٰ کیا تھاکہ ہنیہ کا قتل ایک ریمورٹ کنٹرول بم کے ذریعے کیا گیا جو ہنیہ کے کمرے کے اندر رکھا گیا تھا۔