اسلام پسند قوتیں یکجا ہو کر سیکولر قوتوں کے مکروہ عزائم خاک میں ملادیں، سربراہ ملی یکجہتی کونسل

کراچی : جمعیت علمائے پاکستان و ملی یکجہتی کونسل کے صدر ڈاکٹر صاحبزادہ ابوالخیر محمد زبیر نے کہا ہے کہ محب وطن مذہبی قوتیں پاکستان کی بقا اور سالمیت کے جذبہ سے سرشار ہو کر ایک پلیٹ فارم پر یکجا ہوجائیں اور اقتدار سے سیکولر قوتیں کو نکال باہرکریں۔کراچی میں افطار ڈنر سےخطاب میں صاحبزادہ ابوالخیر نے کہا کہ اسلام دشمن استعماری قوتیں دنیا بھر میں مسلمانوں کا عرصہ حیات تنگ کئے ہوئے ہیں، مسلمانوں کی نسل کشی کی جاری ہے، قبلہ اول مسجد اقصی پر اسرائیلی فوجیں غاصبانہ قبضہ کر کے مسلمانوں کو عبادت سے روک رہی ہیں، مسجد کی بےحرمتی کی جارہی ہے، حال ہی میں سویڈن میں قرآن پاک کی بے حرمتی کر کے مسلمانوں کے دلوں کو زخمی کیا گیا، بھارت میں ہندو انتہاپسندوں نے مسلمانوں کا عرصہ حیات تنگ کردیا ہے، اب وقت آگیا ہے اسلام پسند محب وطن قوتیں یکجا ہو جائیں اور سیکولر قوتوں کے مکروہ عزائم خاک میں ملادیں۔