ایرانی وزیرِ خارجہ کی حزب اللہ کے سیکریٹری جنرل سید حسن نصر اللہ سے ملاقات

لبنان کے سرکاری دورے پر گذشتہ روز بیروت پہنچنے والے ایرانی وزیر خارجہ حسین امیر عبداللہیان نے آج لبنانی مزاحمتی تحریک حزب اللہ کے سربراہ سید حسن نصراللہ سے ملاقات کی ہے۔ عرب نیوز چینل المنار کے مطابق سید مقاومت سید حسن نصراللہ نے حسین امیر عبداللہیان اور ان کے ہمراہ اعلیٰ سطحی سفارتی وفد کا استقبال کیا جبکہ اس موقع پر بیروت میں ایرانی سفیر محمد جلال فیروزنیا بھی ایرانی وزیر خارجہ کے ہمراہ موجود تھے۔ مقامی میڈیا کے مطابق اس ملاقات میں لبنان سمیت پورے خطے کے تازہ ترین سیاسی و میدانی حالات کا جائزہ لیا گیا۔
واضح رہے کہ ایرانی وزیر خارجہ خطے کے ممالک کے اپنے دورے کے دوران گذشتہ روز دمشق سے بیروت پہنچے تھے جبکہ وزارت خارجہ کا قلمدان سنبھالنے کے بعد ان کا بیروت کا یہ دوسرا دورہ ہے۔ یاد رہے کہ گذشتہ دورے پر بھی انہوں نے سید مقاومت سید حسن نصراللہ کے ساتھ ملاقات کر کے خطے کی تازہ ترین سیاسی و میدانی صورتحال کا جائزہ لیا تھا۔