ایران جنگ غلطی، سنگین اثرات مرتب ہوں گے، جرمنی فرانس

برلن : جرمنی اور فرانس نے ایران کیخلاف جنگ کو سنگین غلطی قرار دیتے ہوئے کہا ہےکہ کشیدگی بڑھنے کے ساتھ عالمی معیشت پر سنگین اثرات مرتب ہو سکتے ہیں۔ فرانس کے وزیرِ خارجہ نے ایک بار پھر واضح کیا ہے کہ تنازع کے مقاصد واضح نہیں اور کارروائیاں بین الاقوامی قانون کے فریم ورک سے باہر ہیں، اس لیے فرانس کی شمولیت ممکن نہیں۔ انہوں نے زور دیا کہ تنازع کو مذاکرات کے ذریعے حل کرنا ضروری ہے تاکہ دوبارہ جنگی صورتحال پیدا نہ ہو۔ انہوں نے آبنائے ہرمز کے دوبارہ کھلنے کی ضرورت پر بھی زور دیا اور کہا کہ بین الاقوامی پانیوں میں کسی قسم کی رکاوٹ یا دباؤ قابلِ قبول نہیں۔
ادھر جرمنی کے نائب چانسلر لارس کلنگ بائل نے کہا ہے کہ امریکی صدر ڈونلڈ ٹرمپ نے ایران کے معاملے میں صورتحال کو جس انداز میں دیکھا وہ درست ثابت نہیں ہوا۔ ان کی توقع تھی کہ تنازعہ مختصر وقت میں ختم ہو جائے گا، لیکن اب اس کے سنگین اثرات سامنے آ رہے ہیں۔ کلنگ بائل نے کہا کہ اس جنگ کے خاتمے کی ذمہ داری اب امریکی قیادت پر عائد ہوتی ہے اور اسے جلد از جلد ختم کیا جانا چاہیے۔