Raza Musani 
بیجنگ : بیجنگ میں چینی اور امریکی صدور کی ملاقاتوں میں ایران کی صورتحال اہم موضوع رہی۔ چین نے فوری جنگ بندی اور مذاکرات کی بحالی پر زور دیا ہے۔ چینی وزارتِ خارجہ کے ترجمان نے صدر شی جن پنگ اور صدر ڈونلڈ ٹرمپ کی سربراہی ملاقات کے حوالے سے بتایا کہ چین نے ایران ۔ امریکا کشیدگی کے تسلسل کو بے معنی قرار دیا۔ ترجمان کے مطابق صدر شی جن پنگ نے واضح کیا کہ صورتحال کا جلد سیاسی حل نہ صرف امریکا اور ایران بلکہ پورے خطے اور دنیا کے مفاد میں ہے۔ ترجمان نے کہا کہ چونکہ مذاکرات کا دروازہ دوبارہ کھل چکا ہے اس لیے اسے دوبارہ بند نہیں ہونا چاہیے۔ چین نے ایرانی جوہری پروگرام سمیت دیگر تنازعات کے حل کے لیے مذاکرات اور مشاورت پر زور دیتے ہوئے کہا کہ جامع اور پائیدار جنگ بندی خطے میں امن و استحکام کی بنیاد بن سکتی ہے۔ ترجمان نے آبنائے ہرمز سمیت بحری راستوں کو جلد از جلد بحال کرنے کی ضرورت پر بھی زور دیا تاکہ عالمی سپلائی چین متاثر نہ ہو۔
