تحقیقات میں ثابت ہوگیا ہے کہ اسرائیل غزہ میں نسل کشی کررہا ہے، اقوام متحدہ

جنیوا : اقوام متحدہ کی خصوصی نمائندہ فرانسسکا البانیز نے کہا ہے کہ ایک سال سے جاری تحقیقات میں ثابت ہوگیا ہے کہ اسرائیل غزہ کی پٹی میں نسل کشی کر رہا ہے۔ ہسپانوی پارلیمنٹ سے خطاب میں البانیز نے کہا کہ انہوں گذشتہ سال فلسطین میں اسرائیلی نسل کشی کی کارروائیوں کو دستاویزی شکل دینے کے لیے وقف کردیا تھا۔ انہوں نے اقوام متحدہ کے 30 ماہرین کے تعاون سے جو تحقیقات کیں اس سے تصدیق ہوگئی کہ اسرائیل غزہ میں نسل کشی کے ساتھ ساتھ شدید تباہی کی کارروائیاں کر رہا ہے۔ البانیز نے کہاکہ اسرائیلی نسل کشی نے غزہ کی پٹی میں فلسطینیوں کی زندگیوں کو ناقابل تلافی نقصان پہنچایا ہے۔ حماس کا حملہ اسرائیل کی نسل کشی کا جواز پیش نہیں کرتا۔
انہوں نے کہا کہ نسل کشی کرنے والی ریاست کے ساتھ ہتھیاروں کی تجارت جاری رکھنا اقوام متحدہ کے چارٹر کی خلاف ورزی ہے۔ انہوں نے مزید کہا کہ صرف ہتھیاروں پر پابندی لگانا کافی نہیں ہے۔ انہوں نے اگلے قدم پر اسرائیل کے ساتھ تمام فوجی، علمی اور سفارتی تعلقات منقطع کرنے کا مطالبہ کیا۔