Raza Musani 
نیویارک: اقوام متحدہ نے عالمی برادری سے مطالبہ کیا ہے کہ غزہ میں غیر قانونی اسرائیلی بستیوں کے قیام کی کوششوں کو سختی سے مسترد کر دینا چاہیے۔ اقوام متحدہ کے اسسٹنٹ سیکریٹری جنرل برائے مشرق وسطیٰ امور خالد خیری نے سلامتی کونسل کے اجلاس کے دوران کہاکہ غزہ کے علاقے کو مکمل یا جزوی طور پر کم کرنے یا الحاق کرنے کی کوئی کوشش نہیں ہونی چاہیے۔ انہوں نے فلسطینی حکومت کو مالیاتی چیلنجوں سے نمٹنے۔ حکمرانی کی صلاحیت مضبوط کرنے اور اسے غزہ میں ذمہ داریوں کو سنبھالنے کی خاطر تیار کرنے کے لئے فوری مدد فراہم کرنے کی ضرورت پر زور دیا۔ انہوں نے انسانی بحران سے نمٹنے، جلد بحالی کی کوششیں شروع کرنے، غزہ کی تعمیر نو اور قبضے کو ختم کرنے اور جلد از جلد ایک قابل عمل دو ریاستی حل کے حصول کے لیے سیاسی عمل کی بنیاد رکھنے کی اہمیت پر بھی زور دیا۔
