لڑائی میں شدت، کئی ممالک کے شہریوں کو لبنان چھوڑنے کا حکم

بیروت : حزب اللہ اور اسرائیلی فوج کی لڑائی میں شدت آنے پر امریکا سمیت کئی یورپی ممالک نے اپنے شہریوں کو فوری لبنان چھوڑنے کا حکم دے دیا۔
اسرائیلی فوج اور حزب اللہ کے درمیان گذشتہ رات شدید لڑائی ہوئی۔ اسرائیلی فوج نے رات گئے اور آج صبح جنوبی لبنان میں مختلف مقامات پر ڈرون حملے کئے اور گولے برسائے۔ جس کے بعد شدید لڑائی چھڑ گئی ہے۔ کفر کیلا اور دیر سریان کے دیہات پر حملوں میں کئی افراد زخمی ہوگئے۔ صیہونی حملوں کے جواب میں حزب اللہ نے شمالی اسرائیل میں بیت ہلیل کی طرف درجنوں راکٹ داغ دئے۔ حزب اللہ نے پہلی بار اس صیہونی بستی کو نشانہ بنایا ہے۔
خطے میں جنگ کے بادل منڈلانے پر امریکا، برطانیہ، فرانس سمیت مختلف ممالک نے اپنے شہریوں کو کہا ہے کہ وہ پہلی فلائٹ پکڑ کر لبنان سے نکل جائیں۔ برطانوی فارن سیکریٹری ڈیوڈ لیمی نے کہاہےکہ کشیدگی بہت زیادہ ہے اور صورتحال تیزی سے بگڑ سکتی ہے۔ برطانوی شہریوں کے لیے میرا پیغام واضح ہے کہ فوری نکل جائیں۔ برطانیہ نے خطے میں مزید فوجی تعینات کرنے کا بھی فیصلہ کیا ہے۔