Raza Musani 
کراچی : معروف خطیب و عالم دین علامہ سید شہنشاہ حسین نقوی نے دعا زہرا اور ان کے والدین سے اظہار یکجہتی کرتے ہوئے اپنے پیغام میں کہا ہے کہ دعا زہرا پاکستان کی بیٹی اور شہری ہے، اس کے ساتھ اظہارِ یکجہتی ہر پاکستانی کی ذمہ داری ہے۔ ہر پاکستانی دعا زہراء کا مسلک، مکتب، مذہب اور فقہ دیکھے بغیر پاکستان کی بیٹی ہونے کے عنوان سے اپنا مثبت کردار ادا کرے، بیٹیاں سب کی سانجھی ہوتی ہیں،لہٰذا اس مسئلے کو مسلک ومکتب سے بالاتر ہوکر دیکھاجائے۔ انہوں نے کہا کہ اگر پاکستان میں کسی سازش کے تحت اس مسئلے کو سجایا جا رہا ہے اور کسی بے حیائی کی تحریک کو رواج دینے کی کوشش کی جا رہی ہے، تو پاکستان کے غیرت مند عوام کبھی ایسی سازش کو کامیاب نہیں ہونے دیں گے۔ علامہ شہنشاہ نقوی نے پاکستان کے اداروں سے مطالبہ کرتے ہوئے کہا کہ اسلامی و فقہی قوانین کے مطابق یہ شادی جائز نہیں، لہٰذا اسلامی قوانین کی پاسداری کرتے ہوئے یہ مسئلہ جلد حل نہ کیا گیا، تو پھر پاکستان کے باغیرت عوام بلاتفریق اپنی بیٹیوں کی آزادی اور تحفظ کے انتظام کیلئے آئین و قانون کے وضع کردہ دائرے میں اپنے جائز و قانونی حقوق حاصل کرنے کیلئے احتجاج کے عمل میں اتریں گے اور پھر دعا زہرا کے نام پر پاکستان کی ہر بیٹی کا تحفظ یقینی بنایا جائے گا۔
