Raza Musani 
نئی دہلی : بھارتی حکومت نے اجمیر شریف عرس پر جانے کے خواہش مند پاکستانیوں کو روانگی سے ایک روز قبل ویزے جاری کرنے سے انکار کردیا ۔ وزیر مذہبی امور پیر نور الحق قادری کے دفتر سے جاری بیان میں بتایا گیا ہے کہ زائرین نے 3 فروری کو روانہ ہونا تھا اور بھارتی سفارت خانے نے روانگی کے لیے تیار رہنے کو کہا تھا۔ وزارت مذہبی امور کے مطابق بھارتی حکومت کی جانب سے جاری تمام ہدایات پر عمل کیے جانے کے باوجود انکار ناقابل فہم ہے۔ اس اقدام سے عرس میں شرکت کے خواہش مندوں کے مذہبی جذبات کو ٹھیس پہنچی ہے۔ بھارت کے اس ناروا سلوک کو بھارتی وزارت خارجہ کے ساتھ اٹھایا جائے گا۔ پاکستان نے ہمیشہ بین المذاہب ہم آہنگی کے فروغ کے لیے انڈین ہندو اور سکھ یاتریوں کے لیے ویزے جاری کیے ہیں۔ بھارت نے کورونا کا بہانہ بنا کر عین وقت پر انکار کیا جو دونوں ملکوں کے درمیان زیارت کے پروٹوکول کی خلاف ورزی ہے۔ پاکستان نے دو سال کے دوران کورونا پابندیوں کے دوران بھی ہندو اور سکھ یاتریوں کو ویزے دیے۔
