Raza Musani 
غزہ : برطانیہ میں اسرائیل کے سرپرست وزیراعظم رشی سناک کو بڑا دھچکہ لگ گیا۔ بلدیاتی انتخابات میں ٹوری پارٹی شرمناک شکست سے دوچار ہوگئی۔ بلیک پول کے ضمنی انتخاب میں لیبر پارٹی نے ٹوری پارٹی کو سات ہزار سے زائد ووٹ کے فرق سے شکست دے دی۔ لیبرپارٹی نے کامیابی کو شاندار قرار دیا ہے۔ لیبر پارٹی کے مطابق بلیک پول میں کامیابی اگلے انتخابات میں بڑی کامیابی کا آغاز ہے۔
ٹوری پارٹی کو لوکل باڈیز کی 107 کونسلز کے انتخابات میں بھی بدترین شکست کا سامنا ہے جہاں وہ کئی اہم شہروں میں شکست کھا گئی ہے۔ لندن، مانچسٹر سمیت کئی شہروں میں لیبر پارٹی کا اقتدار مزید مضبوط ہوگیا ہے۔ کئی کونسلز میں ٹوری پارٹی کا مکمل صفایا ہوگیا ہے۔ جبکہ بہت سے علاقوں میں ٹوری پارٹی کے ناراض رہنماؤں نے آزاد حیثیت سے انتخابات میں حصہ لیا ہے۔جس کی وجہ سے وزیراعظم رشی سناک کیلئے بطور پارٹی سربراہ برقرار رہنا تقریباً ناممکن ہوگیا ہے۔
